காகித பூஜை!

எல்லோருக்கும் இன்று ஆயுத பூஜை;

எனக்குமட்டும் காகித பூஜை!

ஆம்!.

கவிதை மலர்களால் மாலை தொடுத்து

அன்னை கலைவாணிக்கு

அணிவித்து மகிழந்த காகித பூஜை!

-கிருஷ்ணன்பாலா

13.10.2013

வாணிக்குக் காணிக்கை!

தீதிலன்,உலகில் யானோர்

தெளிவுளன் நினதருளாலே;

யாதெனை வெல்லும்?;உன்னை

யாசித்தேன்; இன்று,இப்போது

ஓதிடும் உன்றன் நாமம்

ஒளிர்செயக் கண்டேன்;வாணீ,
சோதியே வருக என்னுள்;
சுடர்க, இவ்வுல கெல்லாமே!

• ·        

பூவிற் பொலியும் வாணி; என்றன்

நாவிற்புகுந்து நற்றமிழ் செய்தாள்;

தேவி அவளென் அன்னை;என்னைத்

தேர்ந்தே இப்புவி வைத்தாள்!

கூவி அழைத்து, அவள் தமிழைக்

குவிக் கின்றேன் நான், முகநூலில்

தேவை யுடையீர்,வாருங்கள்;என்

தேன் தமிழ் விருந்தில் சேருங்கள்!

அற்புதமாக ஆர்ப்பரிக்கும்;சொல்

அடுக்கடுக்காக சரம் தொடுக்கும்;

கற்பனையிங்கே படை எடுக்கும்;அது;

காட்டா றெனவே கரை உடைக்கும்!

சிற்சில போழ்து இலக்கணத்தை

சிதறச்செய்யும்; தனை மறக்கும்!

கற்பது யாதெனக் கேட்காதீர்; அந்தக்

கலைமகள்;அவளைக் கேளுங்கள்!

·        

முன்னைப் பழம் விதியின்

முழுப் பயனில் வைத்திங்கு;

என்னைப் படைத்துலகை

எந் நாளும் காப்பவளை;

அன்னை வாணி எனும்

அறிவுடையோர் கருப் பொருளைப்

பின்தொடரும் பிள்ளைஎனப்

பேசுகின்றேன்; அறிவீரோ?

மானுடத்தின் மத்தியில் ஓர்

மனிதனெ எனைப் படைத்து,

வான்புகழும் தமிழ்மறைகள்

வளமைமிகும் இலக்கியங்கள்

நான் படிக்க அருளியவள்;

நான்முகனின் தேவியவள்;

வானவரும் போற்றுகின்ற

வாணியைத்தான் வணங்கு கின்றேன்!

·        ·

வாக்கிலே வந்தாள் அன்னை

வாணியே; ;வந்து,அந்தப்

போக்கிலே புகல வைத்தாள்;

பொய்யிலாச் சேதி;உண்மை1

நோக்கியே சொன்னேன்;நானும்

நுகர்ந்திடும்  மொழியை யிங்கு

தூக்கியே நிறுத்தி என்றும்

தோல்வியைத் தவிர்ப்பாள் வாழி!

·        ·

வாக்கிலே என்றும் உனது

வார்த்தையே வேண்டும்; என்றன்

நோக்கிலே பிழைகள் அற்ற

நுகர்ச்சியே வேண்டும்;வாழ்க்கைப்

போக்கிலே பொய்ம்மை சேராப்

புதுமைகள் வேண்டும்;நெஞ்சில்

தேக்கிநான் வேண்டுகின்றேன்;

தேவைகள் அருள்வாய்,வாணீ!

·        ·

கல்விதான் பெரிதா? செல்வம்

காண்பதே பெரிதா? இதிலே

நல்லது யாதென் றிங்கு

நவில்வதைச் சிந்திக்கின்றேன்:

செல்வத்தைச் செல்வம் என்று

சிந்திக்கும் அறிவில் லாது

செல்வதைப் பெற்ற வாழ்க்கை

சிதைந்துதான் போகும்,வீணே!

கல்வியைப் பெற்ற வாழ்வில்

கசடுகள் சேரா; அதுவே

செல்வமாய்த் திகழ வாழ்வோர்

சிதைவதும் இல்லை; அதனால்

கல்வியே உயர்ந்த தென்று

காண்கிறேன்; வாணி என்றன்

செல்வமாய்த் திகழு கின்றாள்;

சிந்தனை வேறு எதற்கு?

·

உலகிடைப் பிறந்த மாந்தர்

உணர்கின்ற அறிவைப் பெற்று

‘நலமெது? தீதெது?’ என்று

நாடினால் அதுதான் வாழ்வின்

பலம் மிகு துணையாய் மாறி

பலவிதம் உயர்த்தும்;அதனால்

கலைமகள் மாந்தர் வாழக்

கருப்பொருள்; கண்டீர் இங்கே!

·

வாணியைப் போற்றி நின்றால்

வாழ்க்கையில் அறிவு கூடும்;

வாணியால் சேரும் செல்வம்

வளர்ந்திடும் நித்தம் நித்தம்!

வாணியால் தோல்வி இல்லை;

வாழ்க்கையில் வெறுமை இல்லை;

‘வாணியே, வா,நீ’ என்று

வணங்குதல் செய்வோம் வாரீர்!

·      · 

ஊனெடுத்துப் பிறந்த பின்பு

ஓய்ந்து விழும் நாள் வரைக்கும்

நானெடுத்து நடிக் கின்ற

நாடகத்தின்,பாத்திரத்தைத்

தானுரைக்கும் கவிதை இவை;

தருகின் றேன்,நண்பர்களே!

‘யானுளநாள் வரை’,இவற்றை

யாத்திடுவேன்: புரிவீரே!

இவண்-

கிருஷ்ணன்பாலா

13.10.2013