Thursday, July 29, 2010

காதல் அல்ல: இது காமம்!

காதலில் ஏற்படும் தோல்விகளில்
புலம்புவதை மட்டுமல்ல-

காதலையே
எப்பொழுதும் 
முனைந்து முனகுவதைத்
தவிருங்கள்;
நண்பர்களே...

காதல் மட்டுமா மனித வாழ்க்கை? 

காதல் கொண்ட மனது,
அதன் வசப் பட்டிருக்கும்போது
'நிற்கின்ற இடம் சேறு'
என்று கூடப் பார்ப்பதில்லை.

காதலியையோ,காதலனையோ
ஒருவர்-
விட்டுப் பிரியும்போதுதான்,
'தான் சேற்றில் நிற்கிறோமே'
என்று புலம்பச் சொல்கிறது,மனம்!

நண்பர்களே...!
காதல் என்பது எல்லோருக்கும் வருவதுதான்.
ஆனால்-
வருவதெல்லாம் 
காதல் அல்ல;'காமம்' என்கிற கொடுமை.

அது-
வரும்போதே 
கண்களைக் குருடாக்கி விடுகிறது!
பிறகு-
எங்கே நாம் பார்த்துப் பார்த்து
நடந்து கொண்டு  காதலிக்கிறதாம்? 

காதல் என்பது
பல் நிலைகளில் வருதுதான்;

காதலை உணராத
மனிதனில்லை!

ஆனால் 
அதன் காரணத்தை 
அறிந்து கொள்ளாதவன்
மனிதனே இல்லை;
மிருகத்துக்கும் அவனுக்கும் 
வேறுபாடே இல்லை.!
 

விழித்துக் கொண்டு 
காதலிக்கிறவர்களே
புத்திசாலிகள்; 

அவர்கள்- 

காமத்தைத் தடுத்து விடுகிறார்கள்;
காதலித்துவிட்டுப் பின்
புலம்புகிறவர்களோ
புத்திகாலிகள்; 

அவர்கள்-
காமத்தில் தடுக்கி விழுகிறார்கள்!

உண்மையான
காதலின் தோல்வி,
நல்ல கவிதைகளாக மாறும்;


காமத்தினால்
ஏற்படும் சறுக்குதலோ
'கவிதை' என்ற பெயரில் நாறும்.

தயவு செய்து-
உங்கள் வலைத் தளங்களில்
காதலைச் சொல்லுவதாகக்
கற்பனை செய்து கொண்டு
காமத்தின் துர்நாற்றத்தைப் பரப்பாதீர்கள்!


நண்பர்களே...!

காதலில் ஏற்படும் தோல்விகளில்
புலம்புவதைத் தவிருங்கள்;
காதல் மட்டுமா மனித வாழ்க்கை?

இவண்-
கிருஷ்ணன் பாலா

Thursday, July 8, 2010

இது உலகத் தமிழர்களின் உறவுப் பாலம்!

நண்பர்களே,
வணக்கம்.
உலகத் தமிழர்களின் எழுத்துறவுப் பாலமாக இருக்கும் பொருட்டு
இத்தளத்தை உருவாக்கி உள்ளேன்.

நீங்கள் சொல்ல விரும்பும் கருத்துக்களை இங்கே கொட்டலாம்; பகிர்ந்து கொள்ளலாம்;அள்ளிக் கொண்டும் செல்லலாம்.

நாம் முன் பின் தெரியாதவர்களாக இருந்தாலும் தெரிந்து கொள்ள முடியாதவர்களாக இருக்கக் கூடாது.

நாம் தேசங்களைக் கடந்து வாழ்பவர்கள்தாம்;ஆனாலும் நமக்கு எல்லை உண்டு. 'தமிழ்' என்ற எல்லை. இது நமக்குப் பெருமை தருகின்ற 'வரைமுறை' என்ற கர்வத்தோடு, நாம் ஒருவரை ஒருவர் சந்திக்கின்ற இடமாக,தளமாக இந்த மையத்தைத் தெரிந்து கொண்டு அடிக்கடி சந்திப்போம்.

இதில்,நீங்கள் தேடுகின்ற நண்பர்களை எதிர்பாராமல் சந்திக்கக் கூடும்; எதிர்பாராத விஷயங்களைச் சிந்திக்கவும் கூடும்.

இங்கே ஒருவருக்கொருவர் எல்லைகளைக் கடந்த நட்புடன் உணர்வுகளைப் முகவரிகளைப் பரிமாற்றிக் கொண்டு உறவுகளை மேம்படுத்திக் கொள்ளவும் தமிழுக்கும் தமிழர்வாழ்வுக்கும் உரிய சிந்தனைகளைப் பகிரங்கப் படுத்திக் கொள்ளவும் உதவும் அடித்தளத்தை இத்தளம் அளிக்கின்றது.

அடி மனத்தின் ஆழத்திலிருந்து எழும் எனது இந்த அழைப்பு, உங்கள் இதயத்துக்கு.

வாருங்கள்; ஒன்று சேருங்கள்.

நட்புடன்,
கிருஷ்ணன் பாலா

எனது முகவரி:

கிருஷ்ணன் பாலா
282 / 1, கண்ணகி நகர்,
பை பாஸ் சாலை அருகில்,
தாராபுரம்
திருப்பூர் மாவட்டம்
தமிழ்நாடு

அலை பேசி:(00 91 ) 94440 69234
மின்னஞ்சல்:krishnanbalaa@gmail.com