புகழுரைக்கும் அஞ்சுவாய்;
மெய்யுரைக்கு மிஞ்சுவாய்;
மேன்மைகளில் கொஞ்சுவாய்!
நஞ்சுரைக்கும் வஞ்சகர்கள்
நாவிருக்கும் வார்த்தைகள்;
கொஞ்சினாலும் கெஞ்சினாலும்
கோபம் கொண்டு தள்ளுவாய்!
வஞ்சகர்கள் அஞ்சுகின்ற
வார்த்தை என்னும் ஆயுதம்;
வெஞ்சமரில் வீசி நின்று
வெல்வதுபோல் வெல்லுவாய்!
செஞ்சுடரின் கீற்றொளிபோல்
சீறுகின்ற மொழியினால்
மிஞ்ச வரும் பகைஉணர்வை
மிரள வைத்துக் கொல்லுவாய்!
மிரள வைத்துக் கொல்லுவாய்!
தலைசிறந்த பண்புடன்
தமிழன் வாழ்ந்த காலத்தின்
நிலைமைமாறிப் போனதை
நிமிர்ந்து நின்று சொல்லுவாய்!
சரிவில்லாத கருத்தினையேச்
சாற்றுகின்ற போதினில்;
நரிகள் ஊளை இடுமெனில்
நடுநிலைமை தேவையா?
சொற்குவிப்பின் கூர்மையில்
சுவைமிகுந்த மொழியினை
தற்குறிகள் அறிவதில்லை;
தயவு காட்ட வேண்டுமோ?
அகல உழுது விதைப்பதும்;
அறிவு கெட்ட பேர்களை
ஆழ உழுது புதைப்பதும்
உனது தொழில் ஆக்கியே
உற்பத்தியைப் பெருக்குவாய்;
எனது மொழி இதனையே
ஏற்றிருப்பாய்,நெஞ்சமே!
இவண்-
கிருஷ்ணன்பாலா
6.11.2012
காண்க:.http://krishnanbalaa.blogspot.com
1 comment:
உலக அவலங்களை பாடியும் ,படைத்தும் அதை கலை எடுப்பது எப்படி என கன்னத்தில் கை வைத்து கவலையாக, வழி மாறி தடுமாறும் ஆடுகளை நோக்கும் மேய்ப்பான்!!
Post a Comment