Saturday, October 2, 2010

பிதா முன்ஓர் பிரகடனம்!

இன்று-(2.10.2010)உத்தமர் காந்தி பிறந்த நாள்.
“வாழ்க நீ எம்மான்;இந்த வையத்து நாட்டிலெல்லாம்
தாழ்வுற்று வறுமை மிஞ்சி.விடுதலை தவறிக் கெட்டுப்
பாழ்பட்டு நின்ற தாமோர் பாரததேசம் தன்னை
வாழ்விக்க வந்த காந்தி மகாத்ம நீ வாழ்க; வாழ்க!”


-என்று ஏறத்தாழ90 ஆண்டுகளுக்கு முன்
மகாத்மா இவர் என்று அடையாளம் காட்டிவாழ்த்தினான்:
நம் மகாகவி பாரதி.


-அந்த மகாத்மாவை நாமும்
இன்று நினைந்து போற்றுகின்றோம்!


இதோ,


அந்த-


பிதா முன்
ஓர் பிரகடனம்!



அண்ணலே!
போர்ப் பந்தரிலிருந்து
புறப்பட்ட புத்தனே!


வெள்ளை மேகங்களையும்
இருள வைத்து,
சுதந்திர மழை பொழிய வைத்த
காந்தியே,மஹாத்மா!


உனது
காலடிச் சுவடுகளில்
நாங்கள்
நம்பிக்கைகளை மட்டும்
வளர்க்கவில்லை;
நாட்டையும் வளர்க்கின்றோம்!


அதே சமயம்-
எச்சரிக்கைகளையும் ஏந்தி வளர்க்கின்றோம்!


ஏன் தெரியுமா?


அன்று-
உனது போதனைகளால்
மதங்களிலிருந்து
மனிதனை மீட்க வேண்டியிருந்தது;


இன்று-
மனிதர்களிடமிருந்து
மதங்களை
மீட்க வேண்டியிருக்கின்றது!


உலகத்துக்கு
இந்திய தேசத்தை
அடையாளப் படுத்தி-


சக வாழ்வைப் போதித்த
சத்திய மூர்த்தியே!
உத்தமரே!


உன்னை
ரத்தப் புஷ்பங்களால்
அர்ச்சித்த
கோட்சேக்களைக்கூடக்
கும்பித் தயாராக இருக்கின்றோம்;


ஆனால்-
உனது கொள்கைகளைக்
கொல்கின்றவர்களை
மன்னிப்பதாய் இல்லை!


இதோ-


இளைய பாரதத்தின்
எழுந்து நிற்கின்றான்…
ஒளி படைத்த கண்ணும்
உறுதிகொண்ட நெஞ்சுமாய்….


உனது நாட்டுக்கு
உன்னதம் சேர்க்க!


அவன் உனக்குப் பேரன்;
எனினும்-
உன்னை போன்றே
அவனையும் காண
விழைகின்றோம்-
குணங்களில் மட்டுமின்றி
வாழ்கின்ற வயதிலும்!




உலகமே போற்றும்
உனது பிறந்த நாளில்-


நாங்கள்
பிரகடனப்படுத்த விரும்பும்
செய்தி இதுதான்:


‘”எங்கள்
தேசப் பிதாவே!
உனது ராட்டையிலிருந்து
உற்பத்தியான
சாதாரண சுதேசி நூல்
இந்திய தேசியத்தை
இறுகக் கட்டிவைத்தது.


ஆனால்-
அதே ராட்டையைக் கொண்டு
கயிறு திரிக்கின்ற
கயவர்கள்
உற்பத்தியாகி விட்டார்கள்;


நாங்கள்-
உன் ராட்டையிலிருந்து
சாட்டையைத்
திரித்துக் கொள்ளத்
தயாராகி விட்டோம்!”
Post a Comment