எது சொர்க்க வாசல்?

அறிவார்ந்த நண்பர்களே!

“கூரை ஏறி,கோழி பிடிக்க முடியாதவன்

வானம் ஏறி வைகுந்தம் போனானாம்”

என்ற சொலவடை ஒன்று தமிழில் சொல்லப் படும்.

இது எதற்காக?

இளமையை பருவக் கோளாற்றில் ஆழ்த்தி, கேடு கெட்ட நடத்தைகளில் நீந்துபவன் துன்பம் எனும் கரையைத்தான் அடைய முடியும்.

‘மனிதப் பிறவியே மற்றெந்த படைப்புக்களையும்விட மேலானது;உயர்ந்தது’ என்பதை உணர்ந்து,வளர்கின்றவனே பிறவிப் பயன் என்னும் கரையை அடைகின்றான்.

நமக்குக் கிடைத்துள்ள உயர் தகுதியான நிலையே ‘நாம் மனிதர்களாகப் படைக்கப் பட்டுள்ளோம்’ என்பதுதான். மிருகங்களுக்கோ,பறவை முதலான பிற உயிரினங்களுக்கோ.” நல்லது எது?கெட்டது  எது? ”என்று சிந்தித்துச் செயல் படுகின்ற அறிவை இறைவன் தரவில்லை; எனவே அவை அனைத்தின் செயல்பாடுகளுக்கும் வினைப் பயனுக்கும் இறைவனேதான் பொறுப்பேற்றுக் கொள்கிறான்.இறைவன் வகுத்த வினைப்படி செயல்பட்டு முடிவில் அவை முக்தி பெறுகின்றன.

மனிதனுக்கு மட்டும் அவனவன் செயல்களுக்கு அவனவன் அறிவையே காரணமாக்கி வைத்துள்ளான். அந்த அறிவினால் அவன் தன்வினையையும் வினையின் முடிவான வினைப் பயனையும் யாதெனத் தெரிந்து கொள்ளும் வல்லமை இருந்தும் அதைப் பயன் படுத்தித் தன்னை நெறி படுத்திக் கொள்ளாது வளர்ந்து,வாழ்ந்து பின் எவ்விதம் வாழ்வின் அந்திமத்தில் நிம்மதி தேட முடியும்? வாழ்வின் நிம்மதியே சொர்க்கம்.

இதை மானுடனுக்கு உணர்த்தவே இந்த ’வைகுந்த வாசல் திறப்பு’ என்கிற இறை நோன்பை நமக்கு நம் முன்னோர் உருவாக்கி,உணர்த்திச் சென்றுள்ளனர்.

‘மான சரோவர்’என்ற கயிலை யாத்திரைக்குச் செல்லும் நோக்கமும்,’புனித வெள்ளி’ கொண்டாடலும், ’ஹஜ்’ பயணமும், ‘வைகுந்த வாசல்’ திறப்பும் இந்த மானுடத்துக்கு, சொர்க்கத்தின் கதவுகளைத் திறக்ககூடிய ’திறவுகோல்’ இருக்கும் இடத்தை அடைவதற்கான பாதையைச் சொல்லும் நீதியே தவிர வேறு உண்மையல்ல.

ஓ மானுடனே…..

உலகின் எல்லா மதங்களும் மார்க்கங்களும் ‘சொர்க்கம்’ என்ற சொல்லைப் புறக்கணிப்பதே இல்லை;கவனித்தாயா?

நீ வாழும்போது,உனது அறிவையும்  அகச் சான்றையும் முன் நிறுத்தி உனது செயல்களை வகுத்துக் கொள்வதன் மூலம் ’உனக்கு சொர்க்கம் சமீபத்தில் இருக்கிறது’ என்பதை உறுதி செய்து கொள்;

மானுட நேர்மையையும், மனித தர்மத்தையும் பின் பற்றாமல் போய்,பாதை தவறிய பயணம் செய்து விட்டுப் பின் உபாதை கொண்டு அழுவதாலும் ஆண்டவன் அடிபற்றித் தொழுவதாலும் என்ன பயன், நரகத்தை அனுபவிப்பதே உனது வினைப் பயன் என்பதைத் தவிர?

எனவேதான்,” “கூரை ஏறி,கோழி பிடிக்க முடியாதவன்;வானம் ஏறி வைகுந்தம் போனானாம்” என்கிற சொலவடை.

சொலவடையா இது?

அறிவார்ந்த அனுபவங்களின் ஆழமான வைகுந்த வார்த்தை.

இந்த வைகுந்த வார்த்தையின் கதவுகளைத் திறவுங்கள், நண்பர்களே!

அன்புடன் –

கிருஷ்ணன்பாலா

4.12.2012

2012 புத்தாண்டு வாழ்த்து!

உலகத் தமிழ் மையத்தின் 
அறிவார்ந்த வாசக நண்பர்கள் அனைவருக்கும்
எனது 
நெஞ்சார்ந்த புத்தாண்டு வாழ்த்துக்கள்.

உலகம் முழுவதிலும் பரவி வாழும் உங்கள் அனைவரின் உள்ளமும் இல்லமும்
மகிழ்ச்சியும் வெற்றியும் நிரம்பியிருக்கும் ஆண்டாய்
இந்த 2012  ஆண்டு
அமைந்திருக்க
எல்லாம் வல்ல இறைவன் திருவருள் செய்ய
உங்கள் ஒவ்வொருவருக்கும் 
வேண்டிக் கொள்கிறேன்.

நல் வாழ்த்துக்களுடன்,
கிருஷ்ணன்பாலா
1.1.2012

மேடம் ஜெ அவர்கள் புரிந்து கொள்வாரா?

நண்பர்களே,

இன்று (30.12.2011) நடந்த அ.தி.மு.க. பொதுக் குழுவில் அதன் பொதுச் செயலாளரும்,தமிழக முதல்வருமான மேடம் ஜெ. அவர்களின் பேச்சுத்தான் இன்றைய (31.12.2011) செய்திகளின் தலைப்பு.

மிகவும் மாறுபட்ட தெம்பும் தெளிவோடும்  மேடம் ஜெ. சற்றும் குழப்பம் இன்றி ஆற்றிய உரை முன் எப்போதும் இல்லாத  உறுதியுடன் வெளிப்பட்டிருப்பது குறிப்பிடத் தக்கது.

அண்மையில் கட்சியில் அவர் எடுத்த களை எடுப்பில் அவர் காட்டி நிற்கும் வேகமும் அதன் காரணங்களின்மீது கொண்டிருக்கும் கோபமும் மாறாதது;அது நிலையானது;நிஜமானது என்பதை பகிரங்கப் படுத்தியிருக்கிறார்.பாராட்டுவோம்.

"கட்சியிலிருந்து நீக்கப் பட்டவர்கள், வேறு கட்சிகளுக்குச் சென்று அரசியலைத் தொடர்வதில் தவறில்லை;அது ஏற்றுக் கொள்ளப் படக் கூடியதுதான்.ஆனால் நீக்கப் பட்டவர்கள் அதே கட்சிக்காரர்களிடம்,’தாங்கள் மீண்டும் கட்சிக்குள் வந்து கட்சியைக் கைப்பற்றி இப்போது தங்களுக்கு ஆதரவாக நடந்து கொள்ளாதவர்களைப் பழிவாங்குவோம்’ என்று பிரச்சாரம் செய்து வருவதை மன்னிக்கவே முடியாது” என்றும் ”அவர்களுக்கும் அவர்கள் பேச்சைக் கேட்கும் கட்சிக்காரர்களையும் மன்னிக்கவே முடியாது” என்றும் மேடம் ஜெ.அவர்கள் மிகக் கடுமையான குரலில் பேசியிருப்பதன் மூலம் கட்சியை விட்டும் போயஸ் தோட்டத்தில் இருந்தும் களை எடுக்கப் பட்டவர்களின் கபட நாடகங்களுக்கும் சதி ஆடல்களுக்கும் சாவு மணி அடித்திருப்பது குறிப்பிடத்தக்கது.

அவரது பேச்சும் கருத்துக்களின் கோர்வையும் கடுமையான விமர்சகர்களும் குறைகாண முடியாதவாறும் பாராட்டக் கூடிய வகையிலும் அமைந்திருக்கிறது என்பது உண்மை. இது மேடம்  ஜெ.அவர்களுக்கு நல்ல ஆட்சியைத் தருவதற்கேற்ற ஆலோசனைகளை வழங்கும் மதிப்புக்குரிய ஆலோசகர்கள் இப்போது பின்புலத்தில் வந்திருப்பது தெரிகிறது.

இது இனி தமிழ் நாட்டின் ஆட்சி நிர்வாகத்துக்கும் ஆரோக்கியமான அரசியல் அணுகுமுறைகளுக்கும் நல்ல திருப்பத்தைத் தரும் என்று நாம் எதிர்பார்க்கும் அதே தருணத்தில்,கடந்த கால ஊழல், அதற்குக் காரணமானவர்கள்,சட்டத்தை ஏமாற்றி நடத்திய அத்தனை குற்றங்களும் வெளிக் கொணரப் பட வேண்டும்; அவர்களை வெளியேற்றி விட்டதுடன் நின்று விடாமல், ஏமாற்றப் பட்டவர்களின் நிலை,இழப்பு, கொள்ளையடித்த சொத்துக்கள்,இவற்றை ஈடு கட்டும் செயல்முறை,உடந்தையாக இருந்த அதிகாரிகள், அவர்கள் மீதான நடவடிக்கை மற்றும் அதற்கான சட்டப்படியான தண்டனை யாவும் உரிய முறையில் இருக்க வேண்டும்.

தவறு யார் செய்திருந்தாலும் அதைத் தீவிரமாக சட்டத்தின் முன்பு விசாரித்து,நேர்மையான அரசு நிர்வாகம் அமைய சம்பந்தப் பட்டவர்கள் முன் வரவேண்டும்.

குற்றம் செய்தவர்களின் பின்பலம் கருதி அவர்கள் தப்பிவிடுவதோ, தப்ப விடுவதோ கூடாது. அப்படி விட்டு விட்டால் இப்போதைய நடவடிக்கைகள் எல்லாம் எதையோ காப்பாற்றிக் கொள்ள எதற்கோ ஆடிய நாடகமாய் முடிந்து இன்னொரு அரசியல் கேலிக் கூத்தின் ராஜ ரகசியத்தைக் காப்பாற்றும் சதியாகவே ஆகிவிடும்.

இது இன்றைய அறிவார்ந்த ஆலோசகர்களுக்குப் புரியாததல்ல:

மேடம் ஜெ.அவர்கள் புரிந்து கொள்வாரா?

உண்மையுடன்,

கிருஷ்ணன்பாலா

31.12.2011

மூன்று வகை மாணவர்கள்

நண்பர்களே,

ஆசிரியர் பாடங்களைப் போதிக்கும்போது அதைப் புரிந்து கொள்ளும் 

மாணாக்கரில் மூன்று வகைப் பிரிவினர் இருக்கிறார்கள்.

அவர்கள்:
1. பசுமரம்:
ஆணியை அடித்தால் எவ்வளவு ஆழமாக அதை உள்வாங்கிக் கொள்கிறதோ  அதுபோல விஷயங்களைக் கிரகித்துக் கொள்கிறவர்கள் இவர்கள். நல்லதையும் கெட்டதையும்கூட இவர்கள் ஒன்றாகவே பதித்துக் கொள்கிறவர்கள்..

2.பன்னாடை:
கசடுகளைப் பிடித்துக் கொண்டு தெளிந்தவற்றை வெளியில் விட்டு விடும் இயல்புடையவர்கள்.(அதாவது நல்லதைக் கைவிட்டு தீயதை மட்டுமே தேக்கி வைத்துக் கொள்கிறவர்கள்.)

3.அன்னம்:
பாலையும் நீரையும் கலந்து வைத்தாலும் பாலை மட்டும் உறிஞ்சிக் கொண்டு நீரைத் தெளிவாக விட்டு விடும் இயல்புள்ளோர்.(நல்லதை மட்டுமே ஏற்றுக் கொண்டு தீயத்ஹைக் கழித்து விடுகிறவர்கள்.)

குறிப்பு:
------------
’பாலூண் அன்னம் தெளிந்து’ என்று இலக்கிய உவமையாகச் சொல்லப்படும் இதற்கு அன்னப் பறவை பாலை மட்டுமெ உறிஞ்சி விட்டு நீரைத் தவிர்த்து விடுவதாய்ப் பொருள் கூறுவது சரியல்ல. ஏனெனில் அன்னப் பறவையை நாம் கண்டதில்லை. அதன் இயல்பையும் நாம் உணர்ந்து கொள்ள முடிவதில்லை.

உண்மையில், நாம் சாதத்தைப் பாலுடன் கலந்து வைத்து விட்டால்,அந்தச் சாதமானது சிறிது நேரத்தில் பாலை மட்டுமே தன்னோடு ஊறச் செய்து, நீரை விட்டு விடுவதைக் காணலாம். அதாவது, பால் சாதத்தை நீண்ட நேரம் கழித்துப் பார்த்தால்,சாதம் பாலில் ஊறிப்போய் விட்டிருக்கும்; நீர்மட்டும் நீர்த்து அது,சாதத்தில் கலவாமல் இருப்பதைக் காணலாம்.

எனவேதான் ‘பால் ஊண் அன்னம் திரிந்து’ என்று பொருள் சொல்லியிருப்பதானது, காலப் போக்கில் ‘பாலூண் அன்னம் தெளிந்து’ என்று அன்னப் பறவையைச் சொல்லி உவமையைக் கையாளும்’ திரிபு’ ஏற்பட்டு விட்டது.

நண்பர்களே,
எத்தனை முறை நல்ல பண்புகளை இங்கே வலியுறுத்திச் சொன்னாலும் சொல்லும் பொருளை விட்டு விட்டு,நாம் எடுத்துச் சொல்வதை மட்டும் குறைசொல்லும் பன்னாடைகளை நாம் இங்கே,இந்த முகநூலில் நிறையப் பார்க்கலாம்.

இவண்-
கிருஷ்ணன்பாலா

29.12.2011

இது எந்தச் சங்கு?

நண்பர்களே,

நமது மத்திய அமைச்சர்களில் இப்போது திஹார் சிறையில் கம்பி எண்ணிக் கொண்டிருக்கும் 2ஜி  ஊழல் ராஜாவின் TeleCom துறையின்  மந்திரி  பொறுப்பில் இருந்து கொண்டு இந்தியாவின் மாபெரும் ஊழலுக்கு வாக்காலத்துப் பேசிய வக்கீல் கபில் சிபல், அண்மையில் கலந்து கொண்ட சர்வதேசக் கவனத்தை  ஈர்க்கும் முக்கிய நிகழ்ச்சி ஒன்றில் நடந்து கொண்ட   ‘தேசீய’அவமானமிக்க நடத்தை’ சாட்சிதான் இந்தப் புகைப்படம்.

இதில், கபில் சிபல் இன்னொரு நாட்டின் அமைச்சர் முன்னிலையில் ஒப்பந்தம் ஒன்றில் கையெழுத்திடுவதும், அவர் கண் முன்னே நமது இந்திய தேசியக் கொடி தலைகீழாகப் பறந்து கொண்டிருப்பதும் புகைப் படமாகப் பறைசாற்றுகிறது.

இத்தகைய தேசிய அவமானத்தைச் செய்த இந் நிகழ்ச்சி பற்றியோ, அக் குற்றத்துக்குக் காரணமான மத்திய அமைச்சரை ஏன் பதவி நீக்கம் செய்யவில்லை என்பது பற்றியோ நமது இந்தியப் பிரதமரோ செய்தி ஊடகங்களோ இதுவரை ஏன் கொஞ்சம்கூட அலட்டிக் கொள்ளவில்லை   என்பது நமக்கு விளங்கவில்லை

.

இந்தப் புகைப்படம் எனது கண்ணில் பதிவான இன்று (25.12.2011) காலையில்,எனது முகநூல் பக்கத்தில்து குறித்து “இப்பொழுது புரிகிறதா?   ‘முகநூல் போன்ற சமூக வலைத் தளங்களில் எதை வேண்டுமானாலும் எழுதும் எழுத்துக்களுக்குக் கட்டுப்பாடு கொண்டுவரவேண்டும்’ என்று இந்த ஆள் ஏன் திருவாய் மலர்ந்தார் என்பது? இந்த அவமானமிக்க செயலைச் செய்தவனுக்குத்தான் இன்னும் மத்திய மந்திரி பதவியில் நீட்டிக்கச் செய்யும் காங்கிரஸின் தேசிய லட்சணம் தொடர்கிறது.  ‘இந்திய தேசிய மரியாதையைக் காப்பாற்றுவது காங்கிரஸ்தான்’ என்று குரைத்துக் கொண்டிருப்பவர்கள் இதற்கு ஏன் வாய் திறக்கவில்லை? ஒருவேளை அவர்கள் இத்தாலியக் கொடியை இப்படித் தலை கீழாக மாட்டியிருந்தால்தான் இந்த மந்திரியை மாற்றுவார்களோ?” என்று கேட்டிருந்தேன்.

இவ்வாறு நான் எழுதிய கடுமையான கருத்துக்கு, முக நூல் நண்பர் திரு.Mani Manivannan அவர்கள் ‘அது வேண்டுமென்றே தொழில் நுட்ப ரீதியில் ’மார்பிங்;. செய்து வெளியிடப் பட்ட படம்’ என்பதாக் கூட இருக்கும் என்று எழுதி,அப்படித் தவறான படத்தைச் சித்தரித்து வெளியிடுபவர்களுக்கு சட்டப்படித் தண்டனை வழங்கவும் சட்டத்தில் இடம் உண்டு என எழுதியிருந்தார். அவர் எழுதியதாவது: // This looks like a photo shopped fake. No other news media seem to have picked it up. It is ok as a satire but if this was created for fake news, the person that created it is liable for defamation and all the people propagating this without verifying this should apologize and post that apology as their public status, no?//

நான் கேட்கிறேன்:

அந்தப் படம் வேண்டுமென்றே தொழில் நுட்ப ரீதியில் மாற்றி  ‘நமது தேசியக் கொடியை கபில் சிபல் அவமானப் படுத்தி விட்டார்’ என்பதாக அவருடைய அரசியல் எதிர்கள் செய்தார்கள் என்று வைத்துக் கொண்டாலும்கூட, அது பற்றிய  உண்மைகளைக் கண்டாய்ந்து  “அவ்வாறு நமது தேசீயக் கொடிக்கு  எவ்விதமான  அவமானமும் ஏற்படுத்தப் படவில்லை;அதில் மத்திய அமைச்சர் கபில் சிபலுக்கு எவ்விதத்திலும் பங்கு இல்லை” என்று சொல்லும் அதிகாரமும் பொறுப்பும்  யாருக்கு இருக்கிறது?

அது மட்டுல்லாது அவ்வாறு செய்யப் பட்டிருந்தால் அதுவும்கூட ஒரு மாபெரும் தேசியச் சதியாகவும் கிரிமினல் குற்றமாகவும் அறியப் பட வேண்டுமா?,கூடாதா? அப்படிச் செய்தவர்கள்மீது மான நட்ட வழக்குத் தொடுக்கும் உரிமை கபில சிபலுக்கு இருப்பது சட்ட நிபுணரான அவருக்குத் தெரியாததா?

இந்தப் படம் நிஜமாக இருந்தால்,முதலில் பதவி நீக்க்கம் செய்யப் பட வேண்டியவர் கபில் சிபல்தான். இன்னும் சொல்லப் போனால், உண்மை தெரிந்ததும் தானாகவே அவர் பதவி விலகியிருக்க வேண்டும். அல்லது இந்தப் படமே பொய் என்று அறிக்கை விட்ட கையோடு அது பற்றிய விசாரணைக்கு ஆணையிட்டிருக்க வேண்டும்.

இதை மிகக் கடுமையான நடவடிக்கைகுரிய விஷயமாகக் கவனத்தில் கொள்ளாது மெத்தனமாக இருக்கும் கபில் சிபல் பற்றியோ,நமது உள்துறை அமைச்சகம் பற்றியோ அதற்கு மேலான நமது பிரதமரின் கவனமின்மை பற்றியோ நாம் எப்படி எடுத்துக் கொள்வது?

இதற்கெல்லாம் விளக்கம்  சொல்ல வேண்டியது அவரும் அவர் சாந்த மத்திய அரசும்தான் என்பதுடன் இந்தப் படத்தை வேண்டுமன்றே தவறாகச் சித்தரித்துப் பிரசுரித்தவர்கள் மீதும் சம்பந்தப் பட்ட ஊடகத்தின் மீதும் உரிய நடவடிக்கை எடுக்க வேண்டியதுதானே?

நமது உள்துறையும் அதன் உளவுத் துறையும் என்ன செய்து கொண்டிருக்கின்றன?

ஏன் செய்யவில்லை?

நண்பர்களே,

இப்போதெல்லாம் இம்மாதிரியான கவனக்குறைவான நிகழ்வுகள் சகஜம்போல் ஆகி விட்டதாலும்; அதிகாரவர்க்கம் இது போலியான - இட்டுக்கட்டிய புகைப்படச் செய்தியாக இருப்பினும்கூட அதுபற்றியெல்லாம் எண்ணாது ஊழல் குறித்து எழும் விமர்சனங்கள் மக்களிடையே பெரிய அளவில் எழுச்சி பெற்றுவிடக் கூடாது என்பதில் மட்டுமே விழிப்புக் கொண்டிருப்பதாலும்தான் சர்வதேசக் கவனத்துக்குரியதும் தேசிய அவமானச் செயலுக்குரியதுமான இந்திய தேசியக் கொடியைத் தலை கீழாகப் பறக்க விட்டுக் கொண்டு பவிசு காட்டிய மத்திய மந்திரி பற்றி எவ்விதமான கண்டனக் குரலும் எழவில்லை என்கிறேன்.

தேசியக் கொடி பற்றிய தெளிவான சட்டப் பிரிவுகள் இருக்கும்போது சட்டத்தை அமல்படுத்தவேண்டிய அரசே இதில் மவுனம் சாதிப்பதும்,இது பற்றிய கவன ஈர்ப்பை நமது எதிர்க் கட்சிகள் காட்டாதிருப்பதும் நமது இந்தியச் செய்தி ஊடகங்கள் இதில் மழுங்கிப் போய் இருப்பதும் ஏன்?

இந்தக் கேள்வி,செவிடன் காதில் ஊதிய சங்கா?இல்லை நமது தேசீய விழிப்புணர்வுக்கு ஊதப் பட்ட சங்கா?

ஊதிக் கொண்டிருக்கும்-
கிருஷ்ணனன்பாலா

25.12.2011

புனிதனைப் போற்றுமின்!

மனிதநேயம் யாதெனக் காட்டவும்
மாக்களையெல்லாம் மக்கள் ஆக்கவும்
கனிவும் அன்பும் கருணையும் கொண்டு
கடமையை உணர்த்தி, நமை உய்விக்கவும்
தனிஒரு பிறவி எடுத்தே மண்ணில்
தானோர் மகவாய்ப் பிறந்தான்;உண்மை!
புனிதன் ஏசு அவன் தான் கண்டீர்!
போற்றி வணங்குதல் மானுடர் கடமை!

வணக்கத்துடன்,
கிருஷ்ணன்பாலா
25.12.2011